Haziberri festibalak ilusio handiz iragarri nahi ditu aurtengo seigarren edizioan parte hartuko duten musikariak: Silvia Pérez Cruz kantari kataluniarra; 30 urteko ibilbidea bete duen Gari&Maldanbera eta Esanezin musika proiektu gaztea. Hiru belaunaldi ezberdin, hiru estilo ezberdin baina hari komun bat: emozioak modu zintzo eta pertsonalean transmititzeko gaitasuna. Bakoitzak bere unibertso propioa dauka, baina hirurek partekatzen dute musikarekiko begirada emozionala eta gertua. Beraz, parkean sortzen den atmosfera intimo eta magikoarekin bat egiten duen proposamen artistikoa dakargu.

Sílvia Pérez Cruz gaur egungo musikagintzako ahots artistiko berezi eta errespetatuenetakoa da, bai Estatu mailan bai nazioartean. Palafrugellen jaiotako kantautoreak urte luzez eraiki du bere unibertso propioa; etiketa artistiko guztietatik ihes eginez, flamenkoa, folk mediterraneoa, jazza, musika klasikoa, fadoa edota kantautoreen tradizioa modu guztiz naturalean uztartuz. Silviaren ahotsaren nortasuna ikaragarria da, emozioa transmititzeko gaitasun apartarekin.

Bere ibilbidean sari eta aitortza ugari jaso ditu; besteak beste, Musika Garaikideen Sari Nazionala, bi Goya sari eta Latin Grammy sarietarako hainbat izendapen. Musikatik harago ere, sormenaren mugak etengabe zabaltzen dituen artista da: zinema, poesia eta arte eszenikoekin lotutako proiektuetan parte hartu izan du, beti ere edertasunarekiko konpromisoa ardatz hartuta.

Haziberrirentzat ohorea da Gari&Maldanbera parkera ekartzea, eta urtez urte batzen ari garen musikarien izenen artean egotea Gari. Izan ere, euskal musikaren ezinbestekoen artean dago. Hertzainak taldearen ahotsak, belaunaldi oso baten soinu-banda eraikitzen lagundu ostean, bakarkako ibilbidean bide pertsonalagoa eta intimistagoa landu du 30 urtez. Haziberriko publikoarentzat memoria kolektiboaren eta gertutasunaren arteko zubi moduko bat izango da bere kontzertua; urte askotako ibilbidea duen artista bat, baina oraindik ere sormen betean dagoena.

Kartela osatzeko, Esanezin izango da aurten Haziberriko ahots gaztea. Ianire Aranzabek gidatzen duen euskarazko pop proiektuak intimitatea eta hunkidura ditu ardatz. “Esanezin”, hitzak berak dioen bezala, esan ezin diren horiei kantatzeko sortutako proiektua da. 2021ean abiatu zuen bere ibilbidea, eta ordutik hiru lan argitaratu ditu; azkena, Hormetan Idazten. Lan berrian hormak hartu ditu abiapuntu Ianirek: maitasunaz, zauriez eta bizitzaren efimerotasunaz hitz egiteko espazio gisa. Artistaren hitzetan, “horma batean idatzitakoa efimeroa da, gu garen bezalaxe”, eta ideia horretatik eraiki du diskoaren unibertso poetikoa.

LANKIDETZA SAREA ETA DABID ZELAIA-ZUGADI

Beti azpimarratu izan dugu Haziberri ez dela soilik jaialdi bat, lankidetza sare sendo baten emaitza ere badela. Sare horrek egiten du posible festibala urtez urte: boluntarioak, teknikariak, elkarteak, enpresak eta erakunde ugari elkartzen dira egitasmo honen inguruan, eta haien guztien ekarpenik gabe Haziberri ez litzateke posible izango.

Aurten, bereziki, aipamen eta eskertza berezia egin nahi diogu Baserritik Gernikara elkarteari, eta bertan buru-belarri lanean aritu zen Dabid Zelaiari. Haziberri sortu zenean erabaki argi bat hartu genuen, festibala ahalik eta jasangarriena izatea eta bide horretan mila lagunentzat gure baserritarrekin egindako jan-edan eskaintza landu genuen. Proiektu hori posible izan da, hein batean, Dabiden lanari, konpromisoari eta gertutasunari esker.

Bere memoria gurekin gordeko dugu. Eskerrik asko guztiagatik, Dabid; faltan botako zaitugu.

OINARRIZKO INFORMAZIOA

Aipatu beharra dago, beste urte betez, Erronka Garbia ziurtagiriarekin lan egingo dugula, azken finean jaialdia daukagun espazio naturalera moldatzen delako, eta ez alderantziz eta bide horretan jasangarritasunarekin lotutako hainbat neurri hartzen ditugu.

Kontzertuaren oinarrizko informazioari dagokionez aurten 18:00etan irekiko dira jaialdiaren ateak. Lehenbizi Esanezinek joko du atsedengunean. Ondoren kontzertu guneko ateak ireki eta Gari&Maldaberak eskainiko du zuzenekoa. Azkenik gaua egitearekin batera, Sílvia Pérez Cruz kantautorea izango da protagonista, jaialdiari amaiera borobila emateko.

Sarreren prezioa 38 eurokoa izango da eta eskuragarri egongo dira haziberri.eus atarian maiatzaren 20an, 18:00etatik aurrera. Kontzertuko sarrerarekin, parkean bertan kokatutako Euskal Herria Museoa dohainik bisitatzeko aukera egongo da, 2026eko urtea bukatu arte.

The post Sílvia Pérez Cruz, Gari eta Esanezinek osatuko dute aurtengo haziberriren kartela appeared first on Haziberri.

Eskerrak emon gure doguz jaialdia posible egin duten guztiei: laguntzen etorri ziren bolondresari, azkenengo izerdi tantie emon zuten langilieri, laguntzeko prest egon diren norbanako, elkarte, enpresa ta erakundieei, Gatibufonia, Altxaporru, The Uski’s eta Pary&Tizari… Eta zelan ez San Kristobaleko aparkalekua bete zenuten ia 10.000 arima txiki denei.

Eskerrik asko be bai Gatiburi bere ibilbidien azken zati honen parte izeteko aukera emoteagatik. Ohorea izan da taldearenn historiian mugarri txiki hau elkarrekin jartzea.

Eta gogoratu uztailaren 9an beste hitzordu bet dugula Gernikako Europa parkean Rozalén, Olaia Inziarte eta Gaizka Insunzarekin.

Ekitaldiko argazkiak hemen.

The post Eskerrik asko appeared first on Haziberri.

Aurten, lehen aldiz, Euskal Herritik kanpoko musikari bat izango da Haziberrin: Rozalén. Albaceteko Letur herriko kantautorea musika-erreferente bilakatu da Estatu mailan, bere musika konprometitu eta hunkigarriarekin. Rozalenen ibilbidea publikoaren txaloz eta kritikaren aitortzaz josirik dago: hiru Urrezko Disko, hiru Platinozko Disko, Goya sari bat, 2021eko Musika Garaikideetako Sari Nazionala, hiru Latin Grammy izendapen eta Gaztela-Mantxako Meritu Profesionalaren Plaka, besteak beste. Zuzenekoetan milaka jarraitzaile batzen dituen musikaria da egun. 

Gainera, aktibista sozial garrantzitsua da: sortzen duen musikaren bidez gutxiengoen eta baztertuta dauden komunitateen eskubideak defendatzen ditu. Azkenaldian euskarari ere keinu egin dio, aniztasunarekiko sentsibilitate argia erakutsiz. Bere presentziak, ahotsak, sentsibilitateak, Gernikako Europako Herrien parkeak duen berezko magia areagotu egingo du uztailaren 9an. 

Olaia Inziarte nafarra, berriz, euskal musikarien belaunaldi berriko ahots indartsuenetariko bat da. Bere proiektuak freskotasuna eta nortasuna ekarriko ditu oholtzara. “Zerrautsa” bigarren diskoa argitaratuta, Olaia Inziarte etorkizun handiko bidea urratzen ari da. Bere estiloak pop-a, folk-a eta elektronika ukituak uztartzen ditu, eta emozioz beteriko zuzeneko emanaldiak eskaintzen ditu, entzulearekin lotura berezia sortuz. 

Audience taldeko abeslari eta sortzaile gisa ezagutzen dugu arren, Gaizka Insunza gernikarra bakarka ere badabil bere sormen pertsonalari bidea emanez. “Iaz” izeneko bigarren lanarekin dator uztailaren 9an. Insunzak jazz eta soul ukituak dituen diska kaleratu du, oraingoan, euskarari keinu egiten diona. Izan ere, orain arte ingelesez abesten entzun dugu Gaizka.

The post Rozalén, Olaia Inziarte eta Gaizka Insunza Haziberri Festibalaren bosgarren edizioan appeared first on Haziberri.

Gatibuk eta Haziberrik aurkeztu dute dagoeneko “Azken Zoramena Gernikan” jaialdiaren kartel osoa. Ekainaren 7an Gatibuk bere sorterrian emango duen azken kontzertu berezia, arratsaldetik aurrera luzatuko den jaialdia izango da; musika, jan-edana eta festa uztartuko dituena. Gatiburen kontzertu nagusiaz gain, hainbat musika talderen eta artisten emanaldiak izango dira, agurrari benetako festa giroa emanez.

“GATIBUFONIA” SAN KRISTOBAL PLAZAN

Lehenengo hitzordua arratsaldeko 17:30ean izango da, “Gatibufonia” ikuskizun sinfonikoarekin. Gernikako Segundo Olaeta Musika Bandak, Gatibufonia izeneko lanaren bitartez, Gatiburen abestien moldaketa sinfonikoa eskainiko du San Kristobal auzoko plazan -kontzertugunetik hurbil-. 45 musikarik osatzen dute banda, eta euren soinu sinfonikoa gitarra, baxu elektriko eta abeslariekin uztartuko dute. Artur Sustatxaren gidaritzapean, Gatiburen ibilbidea laburbiltzen duen errepertorio berezi bat prestatu dute.

KONTZERTUGUNEAREN IREKIERA 18:30EAN

San Kristobal aparkalekuan kokatuko den kontzertugunearen ateak arratsaldeko 18:30ean irekiko dira. Gatibuz gain, oholtzatik igaroko dira The Uski’s, Ibarrangelu eta Elantxobeko kideek osatutako rock taldea, surf rocka eta pop-a uztartzen dituen Busturialdeko talde ganberro eta esanguratsuenetakoa. Altxaporru, erromeria talde bizkaitarrak, berriz, jai giroa ziurtatuko du bere zuzeneko dantzagarriarekin. Gauari amaiera emango diote Party&Tiza musika jartzaile bikote zornotzarrak, erritmo bizi eta dantzagarrien bidez gaua borobiltzeko.

Musikaz gain, jan-edan eskaintza berezia ere izango da. Baserritik Gernikara elkarteak arduratuko da janari-eskaintzaz jaialdiaren egunean. Tokiko ekoizleen produktuekin egindako burritoak jan ahal izango dira; gure baserrietako produktuak eta Mexikoko gastronomiaren zaporeak uztartuko dituzte.

GATIBUREN AGURRA ETXEAN MILAKA LAGUNEN AURREAN

Gatiburen kontzertuak Gernikan jendetsuak eta hunkigarriak izan dira beti. Aurreikuspenak gaindituz, berriki lekuz aldatu behar izan da “Azken Zoramena”, Astrako aparkalekua txiki geratu delarik. San Kristobal aparkalekuak 10.000 lagunentzako tokia dauka.

Gatibu taldeak etxean eskainiko duen azken kontzertuan errepertorio berezia landuko du, bere sustraietara, bere ibilbidearen hasierako diskoetara joz.

Sarrerak salgai daude oraindik Gernikako Turismo bulegoan eta webgunean.

The post Gatiburen “Azken Zoramena” jaialdiaren kartel osoa aurkeztu da appeared first on Haziberri.

Ez genuen inolaz ere espero kontzertuak izan duen erantzuna. Astrako parkinga txiki geratu denez, kontzertua Astrako parkingetik Gernikako San Kristobaleko aparkalekura leku-aldatuko da.

San Kristobaleko parkinga espazio handiagoa, erosoagoa eta seguruagoa da kontzertuaz gozatu nahi duten gatibuzaleentzat. Lurgorri auzoan kokatuta dagoen aparkaleku honek 10.000 lagunentzako edukiera dauka (Ikusi ubikazio berria). Horrez gain, sarrera gehiago jarri dira eskuragarri, www.haziberri.eus atarian eta Gernikako turismo bulegoan.

Datozen asteetan, gainera, “Azken Zoramena” kontzertuaren kartela osatuko duten musika taldeak iragarriko ditugu. Izan ere, festa arratsaldean hasiko da.

Taldeak agur esango duen urte honetan, “Azken Zoramena” kontzertuak Gatiburentzat duen garrantzia ere azpimarratu nahi dugu. Orain dela 25 urte Gernikan sortua, taldeak etxean eskainiko duen azken kontzertuak esangura berezia izango du. Gernikak Gatiburi emandakoa eta Gatibuk Gernikari eskainitakoa batuko dira ekainaren 7ko gau magikoan; Gatiburen sustraietara joz, errepertorio eta izaera propioa izango duen kontzertu kañeroa osatuz.

The post Gatiburen “Azken zoramena” kontzertua San Kristobaleko aparkalekuan izango da appeared first on Haziberri.

Ilusio izugarria egiten digu zuekin hau partekatzea…Gatibuk Gernikan emango duen azken kontzertua antolatzeko plazerra izango dugu: Azken zoramena Gernikan!

Zoramena izan dira beti Gatibuk Gernikan urteetan zehar eskainitako kontzertuak. Azken kontzertu hau, Astrako parkinean egingo dugu 2025eko ekainaren 7an. Baina ez da Gatiburen kontzertu bat soilik izango, azken agur hau ahaztezina izateko, lehen hiru diskoak hartuko ditu ardatz taldearen sustraietara bueltatuz. Azken urteetako abesti arrakastatsuenak ere taularatuko dituzte. Kontzertu bakarra eta errepikaezina izango da.

Sarrerak internet bidez egongo dira eskuragarri, bihartik aurrera, abenduak 19, eguerdiko 12:00etan, webgunean.

#AzkenZoramena #Gatibu #Haziberri

The post Aurkezpen bideoa appeared first on Haziberri.

25 urteko ibilbide oparoaren ondoren, taldeak agur esango du 2025ean. Testuinguru berezi horretan kokatzen da Haziberri eta Gatiburen arteko elkarlanaren bidez sortutako “Azken Zoramena Gernikan” kontzertua.

Zoramena izan dira beti Gatibuk Gernikan urteetan zehar eskainitako kontzertuak. Izan ere, “Zoramena” izena jarri zioten beren lehenengo diskoari. Orain, Gernikan eskainiko duten azken kontzertua izanik, emanaldiak dimentsio berezia hartuko du. Horregatik, taldearen sustraiei eta hasierei keinua egingo dien errepertorio berezia prestatzen ari dira.

Lehen hiru diskoei keinua

Kontzertuaren lehenengo zatian, taldearen lehen hiru diskoak izango dira ardatz: “Zoramena”, “Disko Infernu”, eta “Laino guztien gainetik, sasi guztien azpitik”. Disko horiek Gatiburen alderik rockeroena erakusten dute. Kantu horiez gain, taldearen abesti arrakastatsuak edo hit-ak ere ez dira faltako. Horregatik, Gatiburen agur birako kontzertuen artean bakarra eta errepikaezina izango da.

Repertorio berezi honetaz gain, Gatiburen hasierako garaiarekin lotutako kolaborazio bereziak ere aurreikusten dira.

Tamainako erronkak, neurriko espazioa

Gernikan Gatiburi egingo zaion agurrak neurri bereko espazioa behar du. Kontzertua egiteko Astrako parkinga leku egokia da: publikoak zuzenekoa eroso ikusteko aukera ematen du, eta Gernikatik kanpo datorren jendearentzat ere kokapen aproposa da, tren eta autobus geltokiak gertu dituelako.

Arratsaldetik hasitako jaialdia

Gatiburen kontzertua gauean izango den arren, arratsaldean zehar beste musika talde batzuk ere arituko dira. Taldeen izenak laster jakinaraziko dira, eta musika emanaldiez gain, bestelako jarduerak eta edari-janari eskaintza izango dira. Jaialdiaren kartel osoa martxoan iragarriko da.

Sarrerak salgai abenduaren 19an

Sarrerak salgai jarriko dira internet bidez, abenduaren 19an, eguerdiko 12:00etatik aurrera, www.haziberri.eus webgunean. Sarrera fisiko mugatuak eskuratu ahal izango dira abenduaren 23an, astelehenean, Gernikako Turismo Bulegoan, 12:00etatik aurrera.

The post “AZKEN ZORAMENA” KONTZERTU BEREZIA GERNIKAN appeared first on Haziberri.

ORDUTEGIA

MAPA

Emanaldian zehar zuen eserlekuetan egon, denok ondo ikusi, entzun eta disfrutatu ahal izateko.

Festibalean bi komun gune daude: kontzertu gunean parkeko komunak (laku parekoak) eta atsedengunean gehitu ditugunak. Mugikortasun murriztuko pertsonentzat ere komun egokitu bat dago kontzertu guneko goiko aldean.

BASERRI-MEX BURRITOA

Aurten ere bertoko produktuekin egindako jateko eskaintza izango dugu Haziberrin. Gogoratu afaltzeko tartea 21:15etan hasiko dela atsedengunean eta ezingo dela jatekorik sartu kontzertu gunera.

*Gluten gabeko burritoa eta aukera beganoa ere egongo da.

ZAINDU DEZAGUN PARKEA

Haziberri musika da, kultura da, baina era arduratsu eta jasangarri batean gozatzeko modu bat ere bada. Horretarako birziklapen gune bat izango da atsedengunean materialen bilketa selektiboa egiteko.

The post Informazio Baliagarria appeared first on Haziberri.

The post Haziberri spota appeared first on Haziberri.

Zuen erantzunek lanean jarraitzeko indarra ematen digute. Mil esker.

The post Sarrerak agortu dira appeared first on Haziberri.